Hamad bin Isa Al Khalifa ya bukaci Iran da ta daina tsoma baki cikin harkokin cikin gida na Bahrain da sauran kasashen yankin Gulf. Ya bayyana cewa kasarsa ta fuskanci “munanan hare-hare” da suka shafi tsaro da zaman lafiya.
Sarkin ya ce hare-haren ramuwar gayya da Iran ta kai sun shafi kasashen Gulf Cooperation Council, inda aka kai farmaki kan muhimman kayayyakin more rayuwa da wuraren fararen hula. Bahrain ta ce ta dakile daruruwan makamai masu linzami da jiragen yaki marasa matuki kafin yarjejeniyar tsagaita wuta ta fara aiki.
Ya kuma yi kakkausar suka ga wasu ‘yan cikin gida da ake zargin suna hada kai da makiya, yana mai kiran hakan “cin amanar kasa da ba za a yafewa ba.”
Wannan na zuwa ne yayin da hukumomi ke kara tsaurara matakan tsaro, inda kotu ta yanke wa wasu hukuncin daurin rai da rai bisa zargin ta’addanci da alaka da Iran, yayin da aka kwace takardar zama ‘yan kasa ga wasu da ake zargi da goyon bayan hare-haren Tehran.
Tushen labari: Newstimehub
