Jimbo la Kano kaskazini mwa Nigeria limeandaa harusi ya pamoja kwa wanandoa 1,500, ikiwa ni sehemu ya mpango wa serikali unaolenga kuwasaidia wanawake walio katika mazingira magumu na kupunguza vikwazo vya kifedha vinavyozuia ndoa.
Hafla hiyo, iliyoongozwa na Gavana wa Jimbo Abba Kabir Yusuf, iliwakutanisha wajane na wanawake vijana kutoka maeneo 44 ya serikali za mitaa jimboni humo.
Gavana alielezea mpango huo kama hatua ya kijamii inayolenga kuimarisha familia, kurejesha matumaini na kukuza maadili mema.
Serikali ya jimbo ilitenga takriban dola za Marekani 220,000 kwa ajili ya awamu hii ya hivi karibuni ya mpango huo. Kila bi harusi alipokea naira 200,000 kama mahari, pamoja na msaada wa kifedha wa kuanzisha biashara ndogo na kuwasaidia wanandoa hao wanapoanza maisha ya ndoa.
Mpango huo si mpya Kano. Jimbo hilo limekuwa likiandaa harusi za pamoja kwa miaka kadhaa, likilenga hasa wajane, wanawake walioachwa na waume zao, na wanawake waliopata changamoto ya kuolewa tena kutokana na gharama zinazohusika.
Mamlaka zinasema mpango huo unalenga sio tu kurahisisha ndoa bali pia kushughulikia changamoto za kijamii na kiuchumi zinazowakabili wanawake walio katika mazingira magumu.
Hata hivyo, harusi hizo za pamoja zimezua mjadala kuhusu iwapo fedha za serikali zinapaswa kutumika kuwezesha ndoa; wakosoaji wakisema kuwa uwekezaji wa muda mrefu katika ajira, elimu na fursa za kiuchumi unaweza kutoa msaada endelevu zaidi kwa vijana na familia zilizo katika mazingira magumu.
Kwa serikali ya Kano, hata hivyo, mpango huo unasalia kuwa sehemu ya juhudi pana zaidi za kuimarisha taasisi ya familia na kushughulikia mambo ambayo maafisa wanayaita matatizo ya kijamii yanayohusiana na umaskini pamoja na kuvunjika kwa mifumo ya familia.
