Gwamnatin Tarayyar Nigeria ta amince da karin wasu alawus da tallafin jin dadi ga ma’aikatan gwamnati, wani mataki da ake sa ran zai kara kudin shiga tare da daga kwarin gwiwar ma’aikata. Shugabar ma’aikatan gwamnati, Didi Walson-Jack, ta bayyana hakan a Abuja, inda ta ce karin ya shafi ma’aikata karkashin tsarin albashi irin su CONPSS da CONRAISS, tare da tabbatar da cewa zai amfani ma’aikata daga manya zuwa kanana.
Ta kara da cewa an sake duba muhimman alawus kamar na tafiya (DTA), estacode da na littafi, inda yanzu ma’aikaci zai iya samun cikakken DTA ko da yana halartar horo a cikin garin da yake aiki. Haka kuma, gwamnati ta bullo da sabon tsarin tallafin ritaya wanda zai bai wa ma’aikaci cikakken hakkinsa bayan ya bar aiki daga shekarar 2026, domin tabbatar da cewa babu wanda zai fita daga aiki ba tare da isasshen tallafi ba.
Baya ga haka, an fara aiwatar da tsarin diyya ga ma’aikata da suka samu rauni ko suka rasu a wurin aiki, yayin da ake ganin wadannan sauye-sauyen sun biyo bayan matsin lamba daga kungiyoyin kwadago sakamakon tsadar rayuwa. Wannan kuma ya zo bayan karin albashi da aka yi a baya ga wasu tsare-tsaren albashi a gwamnati.
A wani bangare kuma, gwamnan jihar Oyo, Seyi Makinde, ya sanar da bayar da tallafin sufuri na ₦10,000 duk wata ga ma’aikatan jihar na tsawon watanni uku, domin rage musu radadin tsadar rayuwa, musamman hauhawar kudin mota. Ya ce wannan mataki zai taimaka wajen saukaka wa ma’aikata da kuma tabbatar da ci gaba da gudanar da ayyukan gwamnati yadda ya kamata.
Majiyar Labari: NEWSTIMEHUB
