Gwamnatin Türkiye ta gabatar da sabbin dokoki kan kafofin sada zumunta domin ƙara kare yara da matasa a yanar gizo. Daga cikin manyan matakan, yara ƙasa da shekaru 15 ba za su iya buɗe asusu ba, yayin da kamfanoni za su tilasta amfani da tsarin tabbatar da shekaru.
Sabbin dokokin sun kuma wajabta wa kamfanonin sada zumunta samar da sabis da suka dace da shekaru, tare da ƙarfafa ikon iyaye ta hanyar kayan sarrafawa kamar iyakance lokacin amfani da kuma sa ido kan sayayya a cikin manhaja. Haka kuma, an umurci kamfanoni su rage tallace-tallace masu cutarwa da kuma daukar matakai don kare yara daga haɗarin yanar gizo.
A bangaren tsaro, an kafa sharadi cewa manyan dandamali dole ne su goge abubuwa masu illa cikin sa’a guda idan lamarin ya shafi tsaron ƙasa ko jama’a. Wadannan dokoki za su fi shafar manyan dandamali masu sama da masu amfani miliyan 10 a kullum a ƙasar.
Haka kuma, an sanya ka’idoji masu tsauri ga kamfanonin wasannin bidiyo, ciki har da haramta wasannin da ba su da tantancewar shekaru. Idan kamfanoni ba su bi dokokin ba, za a iya hana tallace-tallace ko ma rage saurin intanet dinsu sosai. Ana sa ran sabbin dokokin za su fara aiki bayan watanni shida.
Majiyar Labari: NEWSTIMEHUB
