Shugaban Mali Janar Assimi Goita, ya isa birnin Yamai, babban birnin Nijar, a ranar Alhamis, 5 ga Nuwamban 2026, inda takwaransa na Nijar, Janar Abdourahamane Tiani, ya tarbe shi.
Goita ya sauka a filin jirgin saman ƙasa da ƙasa na Diori Hamani da misalin ƙarfe ɗaya na rana, agogon ƙasar. Shugabannin biyu sun saurari taken ƙasashensu kafin su kalli faretin girmamawa na sojoji.
Shugaban na Mali ya kuma gaisa da jami’an gwamnatin Nijar da jami’an diflomasiyya da suka taru domin tarbarsa, kafin ya kalli wani wasan al’adun gargajiya da mawaƙa da ’yan rawa suka gabatar.
Shugabannin biyu sun fara tattaunawa a taƙaice a filin jirgin saman, kafin su wuce zuwa fadar shugaban ƙasa domin gudanar da zaman aiki.
Ana sa ran tattaunawar za ta mayar da hankali kan batutuwan tsaro, tattalin arziki da dabarun siyasa, da kuma ƙarfafa haɗin gwiwa a tsakanin ƙungiyar ƙasashen Sahel, wato AES.
Ziyarar na cikin ƙoƙarin ƙarfafa dangantakar abota, haɗin kai da taimakon juna tsakanin Mali da Nijar, tare da cim ma muradunsu na samun cikakken ikon cin gashin kai, tsaro da ci gaba.
Ana kuma sa ran Goita zai wuce Burkina Faso daga baya a ranar Alhamis.
Mali, Nijar da Burkina Faso sun kafa ƙungiyar AES a watan Yulin 2024, bayan rattaba hannu kan Yarjejeniyar Liptako a watan Satumban 2023. Ƙungiyar ta ginu ne bisa manyan ginshiƙai uku: tsaro da kariya, ci gaba da diflomasiyya.
