A wani taro da aka gudanar a birnin Santa Marta, ƙasashe ciki har da Najeriya sun amince cewa rage dogaro da man fetur da iskar gas yana da muhimmanci wajen tabbatar da tsaron makamashi, musamman a wannan lokaci da rikicin duniya ya ke ƙara tsananta. Ministoci sun bayyana cewa yaƙin Iran da sauran rikice-rikice sun jefa kasuwannin makamashi cikin matsala, lamarin da ya sa farashin mai ke tashin gwauron zabi.
Jami’an Turai sun nuna cewa suna asarar kuɗi mai yawa kowace rana sakamakon rikicin, inda wakilin yanayi na Tarayyar Turai, Wopke Hoekstra, ya ce yanzu akwai dalilai na kasuwanci da ‘yancin kai da ke sa ya zama dole a rage amfani da man fetur. Shugaban Colombia, Gustavo Petro, ma ya yi gargadi mai ƙarfi inda ya ce man fetur na “kai ga mutuwa,” yana nufin illar da yake da ita ga muhalli da rayuwa.
Ƙasashe da dama da ke dogaro da shigo da mai sun bayyana yadda suke fama da ƙarancin mai da tashin farashi a gida. Wakiliyar Birtaniya kan yanayi, Rachel Kyte, ta ce a yanzu duniya na fahimtar cewa man fetur na kawo rashin tabbas fiye da anfani. Duk da haka, manyan masu gurbata muhalli kamar Amurka, China da India ba su halarci taron ba, lamarin da ke nuna rashin jituwa a matakin duniya.
Taron ba zai samar da dokoki masu ɗaurewa ba, amma zai fitar da shawarwari kan yadda ƙasashe za su koma amfani da makamashi mai tsafta. Rahotanni sun nuna cewa har yanzu gwamnatoci na kashe kuɗi sau biyar fiye da na makamashi mai sabuntawa wajen tallafawa man fetur. Masana kimiyya sun kuma yi gargadin cewa duniya ta riga ta yi zafi da kusan digiri 1.4°C, kuma idan ya wuce 1.5°C, za a iya fuskantar manyan illoli kamar lalacewar murjani da narkewar kankara a Greenland.
MAJIYAR LABARI: NEWSTIMEHUB
