Qatar imependekeza kuanzishwa kwa mfumo wa usalama wa kikanda unaozileta pamoja nchi za Ghuba na Iran, ili kuimarisha ushirikiano na kuzuia migogoro zaidi, ikisema vita vya hivi karibuni vinapaswa kuwa “onyo” kwa eneo hilo ili kuimarisha ushirikiano na kuzuia migogoro zaidi.
Waziri Mkuu na Waziri wa Mambo ya Nje wa Qatar, Sheikh Mohammed bin Abdulrahman Al Thani ametoa kauli hiyo Jumapili katika Mkutano wa Kiuchumi wa Qatar jijini New York, uliofanyika pembezoni mwa Mkutano wa 81 wa Baraza Kuu la Umoja wa Mataifa.
“Iran ni jirani yetu,” Al Thani amesema, akisisitiza kwamba eneo la Ghuba linahitaji mfumo wa usalama unaohakikisha hakuna nchi inayotishia nyingine.
Amesema Qatar na washirika wake wa kikanda tayari wanafanya kazi kuelekea kuanzisha utaratibu huo, na akazitaka nchi za Ghuba pamoja na Iran kujenga uhusiano thabiti.
“Ni lazima tuchukue hatua kwa pamoja na kwa uwajibikaji kama eneo moja,” amesema, akiongeza kuwa mzozo wa hivi karibuni umejaribu dhana zilizokuwepo kuhusu usalama na utulivu, na umeleta madhara yaliyovuka mipaka ya Mashariki ya Kati.
Qatar yaahidi kuendelea na juhudi za upatanishi
Al Thani amesema Qatar itaendelea na juhudi zake za upatanishi, kudumisha njia za mawasiliano na kufanya kazi na washirika wa kikanda na kimataifa ili kupunguza mvutano na kusaidia kufikiwa kwa makubaliano ya kidiplomasia.
Amesema mgogoro wa hivi karibuni umeonyesha umuhimu wa kuwepo kwa mifumo ya kikanda inayoheshimu uhuru wa nchi na kuzuia kurudiwa kwa mizunguko ya kuongezeka kwa mvutano.
Qatar imejiweka katika nafasi ya mpatanishi katika migogoro kadhaa ya kikanda na imeendelea kudumisha njia za mawasiliano na pande mbalimbali wakati wa mzozo wa hivi karibuni.
Qatar yatangaza fursa za uwekezaji zenye thamani ya zaidi ya Dola bilioni 60
Sambamba na kauli zake kuhusu usalama, Al Thani alitangaza kuzinduliwa kwa ‘Doha Investment’, jukwaa jipya lililoundwa ili kusimamia na kupanua uwekezaji wa ndani ya Mamlaka ya Uwekezaji ya Qatar (Qatar Investment Authority) na kuongeza ushiriki wa sekta binafsi.
Qatar inatarajia kuanzisha miradi ya miundombinu yenye thamani ya takribani Dola bilioni 38.5 katika kipindi cha miaka mitano ijayo, ikiwemo miradi ya ubia kati ya sekta ya umma na sekta binafsi.
Wakati huohuo, miradi mingine katika sekta ya majengo na hoteli inatarajiwa kuvutia uwekezaji wa sekta binafsi wa takribani Dola bilioni 22.5.
Kwa pamoja, miradi hiyo inawakilisha fursa za uwekezaji zenye thamani ya zaidi ya Dola bilioni 60 katika kipindi cha miaka mitano, kwa mujibu wa serikali ya Qatar.
Kwa mujibu wa serikali ya Qatar, jukwaa la Doha Investment linalenga kusaidia kampuni za kitaifa, kuwezesha kampuni changa kupanua shughuli zao, kuimarisha masoko ya mitaji na kuvutia mitaji pamoja na utaalamu kutoka nje ya nchi.
Al Thani alisema Qatar inalenga kuchanganya matumizi ya serikali katika miundombinu na mitaji kutoka sekta binafsi pamoja na utaalamu wa kimataifa, wakati nchi hiyo ikiendelea kuimarisha uwezo wa uchumi wake kustahimili misukosuko kutokana na hali ya kutokuwa na uhakika katika eneo hilo.
