Libya imepiga marufuku kuingia kwa watu kutoka nchi nne za Afrika, hatua ambayo ina maana ya kuzuia wimbi la wahamiaji wanaotaka kuelekea Ulaya kutoka pwani ya kaskazini mwa nchi hiyo.
Marufuku hiyo, iliyotangazwa mwishoni mwa Jumanne, inasema raia wa Sudan, Eritrea, Ethiopia, na Somalia “hawaruhusiwi kuingia katika eneo la Libya kupitia nchi kavu, bahari, na viwanja vya ndege.” Taarifa ya serikali ilisema msamaha utatolewa kwa wanadiplomasia na wafanyakazi katika sekta ya afya na elimu.
Pwani ya Libya ni njia muhimu kwa wahamiaji kutoka Afrika Kaskazini wanaojaribu kufikia ufuo wa Ulaya kwa ajili ya maisha bora huko. Kwa kawaida hupakiwa na wasafirishaji haramu kwenye boti ndogo na zisizo salama, huku maelfu wakifa wakati wa safari hatari ya baharini.
Mvutano umeongezeka katika miezi michache iliyopita ndani ya nchi hiyo ya Kaskazini mwa Afrika dhidi ya makazi mapya ya wakimbizi kutoka nchi nyingine. Kumekuwa na msako mkali dhidi ya wakimbizi, huku maelfu wakikamatwa, kulingana na Amnesty International.
Boti zilizozuiliwa
Kwa mujibu wa Umoja wa Mataifa, kuna zaidi ya wahamiaji na wakimbizi 900,000 nchini Libya, huku Wasudan wakiwa kundi kubwa zaidi. Wengi wa wahamiaji hawa wananuia kuingia Ulaya lakini boti huzuiliwa mara kwa mara na kurudishwa Libya.
Waandamanaji wa Libya mapema Juni walivamia ofisi ya ujumbe wa Umoja wa Mataifa magharibi mwa mji mkuu, Tripoli, kutokana na ripoti za kuhamishwa kwa wahamiaji nchini humo.
Video zilizosambazwa na wanaharakati kwenye mitandao ya kijamii zilionyesha waandamanaji wakiingia katika makao makuu ya ujumbe wa Umoja wa Mataifa katika eneo la Janzour mjini Tripoli.
Uhamiaji usio wa kawaida unafanyika kaskazini-magharibi mwa Libya, kando ya pwani ya Mediterania, hasa katika miji ya Qarabulli, Sabratha, na Zuwara, huku makundi ya ulanguzi wa watu yakitumia vibaya migawanyiko ya kisiasa na changamoto za usalama nchini humo.
