Rais wa Marekani, Donald Trump, amethibitisha kuwa ameelekezwa na walinzi wa rais pamoja na jeshi la Marekani kutumia ndege tofauti wakati akiondoka Uturuki mwezi uliopita, baada ya kumalizika kwa mkutano wa NATO. Alisema uamuzi huo ulifanywa kwa sababu za kiusalama.
Trump amesema Jumanne kwamba walinzi wake na jeshi walimshauri kutumia “ndege tofauti” wakati akiondoka Uturuki baada ya mkutano wa NATO.
“Ni jukumu la walinzi wa rais. Mimi hufuata tu wanachotaka nifanye. Kwa hiyo, nafuata ushauri wa walinzi na jeshi. Walitaka nisafiri kwa ndege nyingine, yenye usalama,” Trump aliwaambia waandishi wa habari katika uwanja wa ndege wa Andrews, Maryland, baada ya kurejea kutoka Ohio”.
Aliongeza: “Walitaka nifanye hivyo, kwa hiyo nikafanya. Mimi hufanya wanachoniambia.”
Trump alisema pia alidhani kulikuwa na tishio, ingawa hakutoa maelezo zaidi kuhusu aina ya tishio hilo.
“Nadhani kulikuwa na tishio huko. Sikuliuliza sana kuhusu hilo. Ninapata vitisho vingi,” alisema.
Trump aliendelea kusema kuwa anapokea vitisho vingi ambavyo watu hawajui.
“Ninapata vitisho vingi. Nina vitisho vingi ambavyo hamvijui. Rais yeyote mwenye ushawishi mkubwa hupata vitisho vingi. Marais wasio na ushawishi mkubwa hawatishiwi. Na nadhani huenda nikawa rais mwenye ushawishi mkubwa zaidi. Hakuna aliyefanya zaidi yangu katika kipindi cha karibu miaka sita,” alisema.
Ripoti kuhusu kubadilishwa kwa ndege kwa siri
Kauli za Trump zilikuja baada ya ripoti ya gazeti la The Washington Post kueleza kuwa rais huyo alibadilisha ndege kwa siri baada ya kuonekana awali akipanda Air Force One jijini Ankara.
Kwa mujibu wa ripoti hiyo, Trump alihamishwa kutoka Air Force One na kupelekwa kwenye ndege ndogo ya kijeshi katika operesheni ya siri. Wakati huo, Air Force One iliendelea na safari ikiwa na maafisa wa Ikulu ya Marekani, wahudumu wa usalama na waandishi wa habari.
Gazeti la The Washington Post limeripoti kuwa operesheni hiyo imechochewa na madai ya kuwepo kwa tishio la kumuua Trump kutoka Iran. Ripoti hiyo ilisema Trump alitolewa kwenye Air Force One kupitia gari la kuhudumia chakula, kabla ya kupandishwa kwenye ndege nyingine.
Operesheni hiyo ilifanyika baada ya Trump kuhudhuria mkutano wa NATO jijini Ankara tarehe 7–8 Julai.
