Kenya imetangaza kuwa gharama za dawa zinazotumika kutibu aina kadhaa za saratani zitashuka kwa zaidi ya mara saba kufuatia makubaliano mapya kati ya kampuni ya Pfizer na Mamlaka ya Ugavi wa Dawa ya Kenya (KEMSA).
Rais William Ruto anasema kuwa baadhi ya dawa ambazo hapo awali ziligharimu hadi shilingi milioni moja za Kenya kwa kila mzunguko wa matibabu, sasa zitagharimu chini ya shilingi 50,000.
Makubaliano hayo yanahusu dawa zinazotumika kutibu saratani ya matiti, tumbo, utumbo mpana, mapafu, tezi dume na umio, pamoja na saratani ya damu (leukemia), lymphoma na multiple myeloma.
“Leo, Kenya imepata mafanikio makubwa katika matibabu ya aina kadhaa za saratani kufuatia kutiwa saini kwa makubaliano muhimu na kampuni ya Pfizer,” alisema Ruto.
Makubaliano hayo yanatekelezwa chini ya mpango wa Pfizer wa Accord for a Healthier World (Makubaliano kwa Ajili ya Dunia yenye Afya Bora), ambapo kampuni hiyo ya dawa husambaza dawa kwa nchi zenye kipato cha chini bila lengo la kupata faida. Kenya ilijiunga na mpango huo mwaka wa 2025.
Ruto anasema kuwa kupunguzwa kwa bei hizo kutafanya kifurushi cha matibabu ya saratani cha Shilingi 800,000 nchini Kenya, chini ya Mamlaka ya Afya ya Jamii (SHA), kutosheleza gharama za matibabu bila wagonjwa kulazimika kulipa gharama za ziada.
“Matokeo ya makubaliano kati ya Pfizer na Mamlaka ya Ugavi wa Dawa ya Kenya — yanayojulikana kama Accord for a Healthier World — yatafanya kifurushi cha matibabu ya saratani cha SHA cha Shilingi 800,000 kutosheleza kikamilifu bila gharama ya ziada kwa wagonjwa,” alisema Ruto.
Rais pia anasema kuwa Kenya itapata fursa ya kutumia dawa mpya zaidi za saratani bila kusubiri kwa miaka kumi — muda ambao anasema wagonjwa kwa sasa hulazimika kusubiri kabla ya matibabu mapya yenye mafanikio makubwa kupatikana nchini. Pfizer pia inatarajiwa kutoa teknolojia na dawa mpya zaidi ili kusaidia uzalishaji wa dawa barani Afrika.
Kenya inarekodi takriban wagonjwa wapya 44,000 wa saratani kila mwaka, kulingana na Wizara ya Afya, huku gharama kubwa za matibabu zikiendelea kuwa kikwazo kikubwa katika kupata huduma.
Serikali bado haijatangaza tarehe mahususi ya kitaifa ya lini dawa hizo zenye bei iliyopunguzwa zitapatikana kwa wagonjwa kupitia KEMSA na vituo vya afya vya umma.
