Shugaba Bola Ahmed Tinubu ya tabbatar wa ma’aikatan man fetur na Nijeriya cewa matatun man ƙasar, waɗanda suka shafe shekaru da dama ba sa aiki yadda ya kamata, za su koma aiki.
Shugaban ya bayar da wannan tabbacin ne a ranar Alhamis lokacin da ya karɓi shugabannin Ƙungiyar Ma’aikatan Man Fetur da Iskar Gas ta Nijeriya (NUPENG) a Fadar Shugaban Ƙasa da ke Abuja.
Da yake mayar da martani kan damuwar da ƙungiyar ta bayyana, Tinubu ya ce kasancewar ana ganin wuta ko hayaƙi na fitowa daga saman matatar mai ba yana nufin tana aiki yadda ya kamata ba, yana mai jaddada cewa dole ne matatun su kasance masu samar da riba tare da samar da amfanin da aka gina su domin bayarwa.
Ya ce: “Matatun man da kuka ambata za su koma aiki.”
Tinubu ya ce ya amince ya ɗauki alhakin gyara kadarori da kuma basussukan ƙasar da gwamnatocin baya suka bari, ba tare da la’akari da abubuwan da suka faru a baya ba.
Ya ce: “Ni ba mutum ba ne da zai je can, ya dawo ya ce komai yana tafiya daidai saboda na karɓi kadarori da basussukan waɗanda suka gabace ni.”
Ya ƙara da cewa: “Ko mene ne ya faru a shekarun baya, yanzu alhaki ne nawa a matsayina na shugaban ƙasa in gyara su, in sa su yi aiki domin amfanin mafi yawan al’ummar ƙasar. Na ɗauki wannan alhakin, kuma zan yi hakan.”
Shugaban ya kuma kare tasirin manufofin tattalin arziƙin gwamnatinsa, yana mai cewa biyan albashin ma’aikata a kai a kai yana da tasiri mai kyau ga tattalin arziƙin ƙasar baki ɗaya.
Ya ce ma’aikatan gwamnati na tarayya, jihohi da ƙananan hukumomi suna amfana da biyan albashi a kai a kai, wanda hakan ke tallafa wa ’yan kasuwa da iyalai.
Tinubu ya ce gwamnati ta samu kuɗaɗen gudanar da manyan ayyukan more rayuwa na dogon lokaci, inda ya ambaci manyan ayyukan hanyoyi da suka haɗa da Lagos-Ibadan, Abuja-Kaduna, Abuja-Kano da Sokoto-Badagry.
Ya kuma bukaci NUPENG da ta tabbatar da cewa amfanin shirin Compressed Natural Gas (CNG) ya isa ga matafiya, yana mai cewa amfanin shirin bai yaɗu cikin sauri kamar yadda ya yi tsammani ba.
Tun da farko, Shugaban NUPENG, Salimon Oladiti, ya koka kan ci gaba da ɗaukar ma’aikata a matsayin na wucin-gadi a ɓangaren hakowa da samar da man fetur da iskar gas, duk da tattaunawar da aka sha yi da kamfanonin da abin ya shafa.
Ya ce NUPENG da Ƙungiyar Manyan Ma’aikatan Man Fetur da Iskar Gas ta Nijeriya (PENGASSAN) sun jure wannan matsala ne saboda fargabar illar da yajin aikin masana’antu zai iya haifarwa ga tattalin arziƙin ƙasar.
