Tattaunawa tsakanin kasar Senegal da Asusun Ba da Lamuni na Duniya (IMF) ta fara ja baya, lamarin da ke jefa shakku kan kokarin kasar na samun sabon shirin tallafin kudi. Duk da tarurrukan da aka yi a lokacin Spring Meetings a Washington, jami’an Senegal sun kasance masu takaita magana, ba tare da hulɗa sosai da masu zuba jari da sauran masu ruwa da tsaki ba.
Babban matsalar da ke hana cimma matsaya ita ce sabanin fahimta kan wasu muhimman al’amuran tattalin arziki, musamman batun bashin kasa da hasashen kasafin kudi. Yayin da gwamnatin Senegal ke nuna cewa za su iya rage gibin kasafi cikin sauki, IMF na ganin alkaluman sun fi haka girma, tare da nuna damuwa kan yadda sauye-sauyen tattalin arzikin za su dore.
Har ila yau, batun sake fasalin bashi ya zama wani babban cikas, domin Senegal ba ta son sake duba tsarin bashinta, yayin da IMF ke bukatar tsari mai inganci kafin amincewa da sabon lamuni. Bugu da kari, gano wasu basussuka da ba a bayyana ba a baya ya kara rikitar da lamarin, yana jawo damuwa kan rashin gaskiya da bayyana bayanai ga masu zuba jari.
A gefe guda, gwamnati na kara dogaro da kasuwannin yanki da kuma lamuni na gajeren lokaci domin biyan bukatunta, wanda shi ma yana dauke da hadari. Tashin farashin makamashi a duniya da kuma matsin lambar tallafin gwamnati na iya kara wahalar da kokarin daidaita tattalin arzikin kasar, yayin da har yanzu akwai bambance-bambance tsakanin bangarorin biyu duk da cewa ana ci gaba da tattaunawa.
Majiyar labari: NEWSTIMEHUB
