Wata babbar kotun tarayya da ke Abuja ta yanke wa tsohon muƙaddashin Akanta Janar na Nijeriya, Anamekwe Nwabuoku, hukuncin ɗaurin shekaru 72 bayan samun sa da laifin halasta kuɗaɗen haram. Alƙali James Omotosho ya bayyana cewa hukumar EFCC ta gabatar da hujjoji masu ƙarfi da suka tabbatar da zarge-zargen da ake masa.
An tuhumi Nwabuoku da aikata laifuka da suka haɗa da damfara da halasta kuɗin haram da ya kai naira miliyan 868.4. Kotun ta same shi da laifi a tuhume-tuhume guda tara, inda aka yanke masa hukuncin shekaru takwas kan kowanne laifi, wanda gaba ɗaya ya kai shekaru 72, amma za a yi hukuncin ne lokaci guda.
Alƙalin ya bayyana yadda aka karkatar da kuɗaɗen da aka ware domin tsaro a ma’aikatar tsaro a matsayin abin takaici, yana mai yabawa EFCC kan ƙoƙarinta wajen gudanar da bincike da gurfanar da shari’ar. Haka kuma an nuna cewa wanda ake tuhuma ya mayar da naira miliyan 200 yayin bincike, abin da bai hana kotu yanke masa hukunci ba.
Nwabuoku ya riƙe muƙamin muƙaddashin Akanta Janar ne a shekarar 2022 bayan tsohon shugaban ƙasa Muhammadu Buhari ya naɗa shi, amma daga baya aka cire shi bayan fara binciken EFCC a kansa. Shari’ar ta ƙara nuna ƙoƙarin hukumomi wajen yaƙi da cin hanci da rashawa a ƙasar.
