Hukumar yaƙi da cin hanci da rashawa ta Nijeriya (ICPC) ta sanar da cewa za ta gurfanar da tsohon gwamnan jihar Kaduna, Nasir El-Rufai, a gaban babbar kotun tarayya da ke Kaduna. A cewar hukumar, an riga an shigar da takardar tuhuma tun ranar 18 ga Maris, wadda ta ƙunshi zarge-zarge irin su karkatar da kadarorin gwamnati da kuma halasta kuɗaɗen haram.
ICPC ta bayyana cewa za a gurfanar da El-Rufai tare da wasu mutane biyu, ciki har da Joel Adoga, yayin da kuma aka shigar da wata ƙara ta daban a babbar kotun jihar Kaduna. Wannan ƙarar ta shafi zargin amfani da muƙami ba daidai ba, damfara da kuma yunkurin aikata damfara domin samun abin da bai dace ba.
Hukumar ta kuma bayyana cewa an riga an miƙa takardun tuhumar ga El-Rufai, tare da jaddada cewa za ta bi doka da ka’idoji wajen gudanar da shari’ar. Sai dai har yanzu ba a bayyana ranar da za a gurfanar da shi a kotun jihar ba, inda kotu ce za ta tsara hakan nan gaba.
Tun bayan da EFCC ta sake shi a watan Fabrairu, El-Rufai ya kasance a hannun ICPC, kuma wata kotun majistire ta ba da damar tsawaita riƙonsa na wasu kwanaki 14. Wannan lamarin ya janyo cece-kuce, inda mutane da dama ke matsa lamba ga hukumomi su gaggauta gurfanar da shi ko kuma su sake shi.
Majiyar Labari: NEWSTIMEHUB
