Ma’aikatar tsaron Saudi Arabia ta bayyana cewa ta samu nasarar harbo jirage marasa matuki guda 13 a sararin samaniyar Riyadh da yankin Gabas, yayin da rikicin da ke tsakanin Iran da kawayenta ke kara tsananta a yankin. Sai dai har yanzu ba a fitar da cikakken bayani kan ko akwai asarar rayuka ko barna da aka yi ba.
Wannan lamari na zuwa ne a lokacin da tashin hankali ke karuwa tun bayan harin hadin gwiwa da Amurka da Isra’ila suka kai wa Iran a karshen watan Fabrairu, wanda ya yi sanadin mutuwar kusan mutane 1,300, ciki har da tsohon jagoran addinin kasar, Ali Khamenei.
A martanin da Iran ta mayar, ta kai hare-haren jiragen marasa matuki da makamai masu linzami kan Isra’ila da wasu kasashe kamar Jordan, Iraq da kasashen Gulf da ke dauke da sansanonin sojin Amurka. Hare-haren sun haddasa asarar rayuka, lalata ababen more rayuwa da kuma dagula harkokin tattalin arziki da zirga-zirgar jiragen sama.
Yayin da bangarorin ke ci gaba da daukar matakan soji, ana fargabar cewa rikicin na iya kara fadada, wanda zai shafi zaman lafiyar yankin baki daya.
Majiyar Labari: NEWSTIMEHUB
