Aƙalla mutum 23 ne suka rasa rayukansu yayin da fiye da mutum 140 suka jikkata sakamakon hare-haren ƙunar-baƙin-wake da suka auku a Maiduguri, babban birnin Jihar Borno, a daren Litinin. Hare-haren sun faru a wurare daban-daban da suka haɗa da ƙofar Asibitin Koyarwa na Jami’ar Maiduguri, Monday Market da kuma wani gidan waya a cikin birnin.
Jami’in hulɗa da jama’a na rundunar ‘yansandan jihar, ASP Nahum Kenneth Daso, ya bayyana cewa ana zargin hare-haren ƙunar-baƙin-wake ne suka haddasa fashewar bamabaman. Ya kuma tabbatar da cewa an shawo kan lamarin, inda ya buƙaci al’umma su rika kai rahoton duk wani abu da suka ga yana da alamar hatsari.
Rahotanni daga hukumar ba da agajin gaggawa ta NEMA sun nuna cewa adadin waɗanda suka jikkata ya kai kusan 169, inda ake kula da su a asibitoci daban-daban a Maiduguri, ciki har da Asibitin Koyarwa da sauran manyan cibiyoyin lafiya.
Mazauna birnin sun bayyana cewa irin waɗannan hare-hare sun ragu a ‘yan shekarun baya, amma a yanzu ana ganin alamun dawowarsu, lamarin da ke jefa mutane cikin fargaba da rashin tabbas game da tsaron yankin.
Majiyar Labari: NEWSTIMEHUB
