Tsoffin pyramids na Meroe a Sudan, waɗanda suka kwashe kusan shekaru 2,000 suna tsaye, yanzu suna fuskantar babbar barazana sakamakon yaƙi. Wadannan gine-gine fiye da 200, da aka gina tun zamanin Masarautar Kush, sun jure lokaci da yanayi, amma a yau sun yi shiru yayin da rikici tsakanin sojojin Sudan da Rapid Support Forces ke ci gaba.
A da wurin na cike da masu yawon buɗe ido, amma yanzu ya zama babu kowa sai ’yan kaɗan da suka sadaukar da kansu wajen kare shi. Daga cikinsu akwai Mostafa Ahmed Mostafa, mai shekaru 65, wanda iyalinsa suka daɗe suna kula da wurin tsawon shekaru. Tare da masana tarihi irin su Mahmoud Soliman da Mohamed Mubarak, suna ƙoƙarin kiyaye gine-ginen duk da ƙarancin kayan aiki.
Pyramids ɗin sun sha lalacewa tun shekaru aru-aru, musamman a ƙarni na 1800 lokacin da masu neman dukiya irin su Giuseppe Ferlini suka lalata wasu. Wasu kuma sun lalace ne a hankali sakamakon yanayi, ciki har da pyramid na Sarauniya Amanishakheto, wanda a da ya kasance ɗaya daga cikin mafi girma amma yanzu ya kusa zama yashi.
Kafin rikicin, wurin yana samun farfaɗowa musamman bayan juyin juya halin Sudan na 2018–2019, inda matasa suka fara nuna sha’awa ga tarihinsu. An riƙa shirya bukukuwa da yawon buɗe ido, amma yanzu mafi yawan mutane sun fi mayar da hankali kan rayuwa da tsira.
Duk da haka, waɗanda suka rage a Meroe suna ganin kare wannan tarihi yana da muhimmanci. Suna fatan wata rana zaman lafiya zai dawo, domin a sake gyara wadannan gine-gine tare da buɗe su ga duniya kamar yadda aka saba.
MAJIYAR LABARI: NEWSTIMEHUB
