Rais wa Uganda, Yoweri Museveni, amewasili jijini Dar es Salaam, Tanzania, kwa ziara ya kazi ya siku mbili kwa mwaliko wa Rais wa Tanzania, Samia Suluhu Hassan.
Rais Museveni ametangaza kuwasili kwake kupitia ukurasa wake wa X, akisema ziara hiyo inalenga kuendeleza na kuimarisha uhusiano mzuri uliopo kati ya Uganda na Tanzania.
“Nimewasili Dar es Salaam, Jamhuri ya Muungano wa Tanzania, kwa mwaliko wa Mheshimiwa Dkt. Samia Suluhu Hassan kwa ziara ya kazi ya siku mbili,” Museveni aliandika.
Amesema Uganda na Tanzania zimekuwa na uhusiano bora kwa miaka mingi, unaojengwa juu ya historia ya pamoja, misingi ya Uanamajumui, na dhamira ya kuendeleza ushirikiano wa kikanda.
Akiwa Tanzania, Museveni na mwenyeji wake watafanya mazungumzo kuhusu kuimarisha uhusiano na ushirikiano kati ya mataifa hayo mawili, yakijikita katika biashara, uwekezaji, nishati, miundombinu, usafirishaji, ulinzi na usalama pamoja na masuala ya kikanda.
