Hukumar kula da ‘yan Najeriya mazauna ƙasashen waje, Nigerians in Diaspora Commission (NIDCOM), ta nuna matuƙar damuwa kan yadda ake cin zarafin ‘yan Najeriya da sauran baƙin fata a Afirka ta Kudu, tare da kira ga gwamnati da ta ɗauki matakan gaggawa don kare su. Shugabar hukumar, Abike Dabiri-Erewa, ta bayyana cewa duk da ƙoƙarin da aka yi a baya don rage tashin hankali, halin da ake ciki yanzu na ci gaba da tabarbarewa.
Ta ce rahotanni sun nuna cewa ɗaliban da ke da asalin Najeriya na tsoron zuwa makaranta, yayin da ‘yan kasuwa ke tsoron buɗe shaguna saboda hare-hare, sace-sace da barazana. Shugabannin al’umma sun kuma tabbatar da sabbin hare-hare da tsoratarwa da aka samu cikin kwanaki uku da suka gabata.
NIDCOM ta bukaci gwamnatin Afirka ta Kudu da ta ɗauki matakai masu ƙarfi domin kare dukkan baƙi a ƙasar, bisa dokokin ƙasa da ƙasa da kuma yarjejeniyoyin Tarayyar Afirka kan ‘yancin ɗan Adam. Ta kuma jaddada cewa ba daidai ba ne a jingina laifi ga dukkan ‘yan Najeriya, tana mai cewa laifi ba shi da ƙasa, kuma duk wanda ya aikata laifi ya fuskanci hukunci bisa doka.
Hukumar ta kuma shawarci ‘yan Najeriya da ke Afirka ta Kudu da su kasance masu bin doka tare da kauce wa wurare masu haɗari, musamman da dare. Ta ƙara da cewa tana aiki tare da ofishin jakadancin Najeriya a Pretoria da kuma ofishin jakadanci a Johannesburg domin shawo kan matsalar. A ƙarshe, ta yaba wa mafi yawan ‘yan Afirka ta Kudu da ke zaune cikin zaman lafiya da baƙi, tare da kira ga a kwantar da hankali da mutunta rayuwar ɗan Adam.
MAJIYAR LABARI: NEWSTIMEHUB
