Ministocin harkokin waje na ƙasashen Larabawa da na ƙasashen Musulmai sun yi taro a Jordan ranar Laraba, don daidaita matsaya guda kan Gabashin Birnin Ƙudus, yayin da damuwa ke ƙaruwa kan matakan Isra’ila a birnin da kuma wuraren ibada tsarkaka.
Taron da aka yi a Amman ya tattaro mambobin kwamitin ministocin ƙasashen Larabawa kan Gabashin Birnin Kudus, da Sakatare Janar na Ƙungiyar Ƙasashen Larabawa Ahmed Aboul Gheit, da ministocin harkokin waje na Turkiyya, da Pakistan, da Indonesia da Malaysia, in ji kamfanin dillancin labaran gwamnatin Jordan, Petra.
Ministocin sun tattauna sabbin abubuwa da ke faruwa a Gabashin Birnin Kudus da aka mamaye, da kuma ƙoƙarin tsara martani na diflomasiyya na bai-ɗaya ga abin da suka bayyana a matsayin ƙaruwar manufofin Isra’ila da ke shafar asalin birnin, da gadon addini da matsayinsa.
Fidan ya gudanar da tattaunawar diflomasiyya
A gefen taron, Ministan Harkokin Wajen Turkiyya, Hakan Fidan, ya yi tattaunawa daban-daban da Mataimakin Firaministan Jordan, da kuma Ministan Harkokin Waje, Ayman Safadi, da Ministan Harkokin Wajen Aljeriya, Ahmed Attaf, in ji Ma’aikatar Harkokin Waje ta Turkiyya.
Jordan ta karɓi baƙuncin taron a matsayinta na mai kula da wuraren ibadar Musulmi da Kiristoci a Gabashin Birnin Kudus.
Kwamitin ministocin ƙasashen Larabawan ya ƙunshi ƙasashen Jordan, Tunisiya, Aljeriya, Saudiyya, Somaliya, Iraki, Qatar, Masar da Maroko, tare da Sakatare Janar na Ƙungiyar Ƙasashen Larabawa.
Taron ya zo ne a yayin da Isra’ila ke ci gaba da ɗaukar matakai da ƙasashen Larabawa da na Musulmai ke cewa suna barazana ga yanayin birnin, da matsayin tarihin Gabashin Birnin Kudus da wuraren ibadun cikinsa.
