Kotun International Criminal Court ta umarci a biya diyyar Euro miliyan 7.2 ga waɗanda wani tsohon jagoran ‘yan ta’adda daga Mali ya cutar, bayan an same shi da laifuffuka masu tsanani.
Mutumin, Al Hassan Ag Abdoul Aziz Ag Mohamed Ag Mahmoud, an same shi da laifi a 2024 na aikata laifukan yaƙi da kuma cin zarafin bil’adama, ciki har da azabtarwa da tsangwama ta addini. Ya kasance ɗaya daga cikin manyan mambobin Ansar Dine, wadda ta mamaye birnin Timbuktu tsakanin 2012 da 2013.
Kotun ta ce sama da mutane 65,000 za su amfana da wannan tallafi, wanda zai haɗa da shirye-shiryen al’umma kamar ilimi, tallafin tattalin arziki da kuma kula da lafiyar kwakwalwa. Wadanda suka fi shan wahala, musamman masu fama da azabtarwa, za su samu kulawa ta musamman.
An kuma jaddada cewa mata da ‘yan mata sun fi fuskantar illa, don haka za a ba su fifiko a cikin shirin taimakon. Duk da cewa shi ne ke da alhakin biyan diyya, ba shi da kuɗin, don haka za a biya daga wani asusun musamman da ƙasashe mambobin kotun suka samar.
MAJIYAR LABARI: NEWSTIMEHUB
