An saki wasu mata ’yan ƙasashen Turai biyu da ƙungiyar ’yan ta’addar Daesh ta yi garkuwa da su a yankin Sahel na Nijar a shekarar 2025, bayan sun shafe watanni a tsare, a cewar rahotanni.
An miƙa ’yar ƙasar Austria, Eva Gretzmacher, mai shekara 76, da ’yar ƙasar Switzerland, Claudia Abbt, mai shekara 69, ga hukumomi a Benghazi, gabashin Libya, a ranar Laraba. Ana sa ran za su koma ƙasashensu a ranar Alhamis.
An yi garkuwa da Gretzmacher a Agadez a ranar 11 ga Janairu, 2025, yayin da aka sace Abbt a ranar 13 ga Afrilu, 2025.
Gidan talabijin na Libya mai suna Al-Masar ya ruwaito cewa Saddam Haftar, mataimakin babban kwamandan rundunar sojin Libya ta LNA, ya taka muhimmiyar rawa wajen ganin an sako matan, bayan iyalansu sun yi kira da a taimaka musu.
Sun nuna godiya
A wani faifan bidiyo da tashar ta watsa, matan biyu sun bayyana a gajiye, amma sun nuna godiyarsu ga Marshal Khalifa Haftar da ɗansa bisa taimakawa wajen tabbatar da ’yancinsu.
Ba a bayyana cikakken bayani kan yadda aka sako matan ba. A lokacin da aka fitar da rahoton, hukumomin Nijar ba su ce komai game da sanarwar ba.
Rahotanni sun kuma ce hukumomin Libya da ke Benghazi sun taka rawa wajen sakin wani Ba’amurke mai wa’azin addinin Kirista, Kevin Rideout, wanda aka yi garkuwa da shi a Yamai, babban birnin Nijar, daga bisani aka sake shi a Libya.
