Hukumomin tsaro a yankin Agadez na Niger sun kaddamar da wani gagarumin samame domin yaki da aikata laifuka, inda aka kama mutane 347 a daren ranar 28 ga Afrilu. Wannan mataki ya biyo bayan wani taron tsaro da gwamnan yankin, Ibra Boulama Issa, ya jagoranta domin duba halin da ake ciki da kuma ƙarfafa matakan tsaro.
Taron Majalisar Tsaro ta Yanki ya tattauna muhimman batutuwa ciki har da sake farfado da aikin “Tcheton KASSA” da kuma hanyoyin inganta tsaro. A cikin samamen da ’yan sanda da jami’an tsaro suka gudanar tare da hadin gwiwar sashen binciken laifuka, an kai farmaki wuraren da ake yawan aikata laifi a unguwannin Tadress da Abalan.
Daga cikin mutanen da aka kama akwai maza ’yan Nijar 270, ’yan kasashen waje 39, da mata 38. Haka kuma an kwace kayayyaki da dama ciki har da motoci 2, babura 53, makamai masu kaifi da kuma na’urorin shan chicha.
Hukumomi sun ce wannan aiki na daga cikin kokarin da ake yi na dakile laifuka da tabbatar da zaman lafiya a yankin, tare da ci gaba da daukar matakai domin kare al’umma.
MAJIYAR LABARI: NEWSTIMEHUB
