Kamfanin ƙera kayan tsaro na Turkiyya, Aselsan, zai baje-kolin jirgin ƙarƙashin ruwansa mai iya sarrafa kansa mai suna Deringoz, a taron fasahar tsaron ruwa na TEKNOFEST Blue Homeland, wanda za a fara ranar Alhamis.
Jirgin zai nuna irin ƙwarewarsa a Cibiyar Kera Jiragen Ruwa ta Sojojin Ruwa ta Gölcük, da ke lardin Kocaeli a arewa maso yammacin Turkiyya, kuma jirgin zai ci gaba da kasancewa a wajen baje kolin har zuwa ranar Lahadi.
An ƙera Deringöz ne domin ayyukan ganowa da kawar da nakiyoyi, tsaron tashoshin jiragen ruwa da kuma kare muhimman ababen more rayuwa da ke ƙarƙashin ruwa.
Haka kuma jirgin yana aikin sa ido kan bututun mai, tare da tallafa wa ayyukan bincike a ƙarƙashin ruwa.
Jirgin na da ƙwarewar da zai iya aiki da kansa ta hanyar sa ido da binciken ƙwaƙƙwaf a wurare masu haɗari ko kuma masu wahalar isa a ƙarƙashin ruwa, ba tare da ya samu taimako mai ƙarfi daga bil’adama ba.
