An kashe mutane 7 kuma da dama sun ji raunuka a rikici tsakanin ‘yan sanda da mambobin wata ƙungiyar masu fafutuka da aka haramta a Kashmir da ke ƙarƙashin ikon Pakistan, in ji hukumomi a ranar Litinin.
Mabiya Gamayyar Kwamitin Awami (Joint Awami Action Committee – JAAC), wata ƙungiya mai adawa da gwamnati da ke neman a yi gyare-gyaren tattalin arziki da shugabanci, sun yi niyyar ci gaba da zanga-zangar kwanaki bayan gwamnatin yankin ta haramta ƙungiyar ƙarƙashin dokokin yaki da ta’addanci.
Kwamishina Sardar Waheed, babban jami’in farar hula a birnin Rawalakot, inda rikicin ya faru, ya shaida wa AFP cewa an kashe fararen hula 3 kuma 40 sun ji raunuka.
‘Yansanda sun tabbatar a cikin wata sanarwa cewa lamarin ya yi sanadin rasuwar jami’an ‘yan sanda 4 yayin da 23 suka samu raunuka.
‘Yansanda sun ce an rufe babban ofishin na JAAC a ranar Lahadi, kuma an sanya haramcin tarurruka masu yawa a Muzaffarabad, babban birni a Kashmir da ke ƙarƙashin mulkin Pakistan.
Kasuwanni sun kasance a buɗe a Muzaffarabad, yayin da jami’an tsaro ke sintiri cikin birnin a ranar Litinin, bayan mazauna sun yi kokarin sayen kayayyaki a karshen mako domin tanadi, biyo bayan tsammanin zanga-zanga da rufe wurare, in ji wani ɗanjaridar AFP.
Mambobin JAAC sun kira sanya sunansu a matsayin kungiyar ‘ta’adda’ a matsayin ‘zalunci’, suna cewa suna zanga-zanga ne domin neman haƙƙoƙin tattalin arziki da na siyasa da suka dace.
Hukumomi sun tabbatar da cewa fiye da mambobi 70 na JAAC aka kama a ƙarshen makon.
An shafe kwanaki ana munanan arangama tsakanin ‘yansanda da masu zanga-zangar da JAAC ke jagoranta a yankin Himalaya a watan Satumba, inda aka tabbatar mutuwa mutum 9.
Ƙasashen Indiya da Pakistan suna da’awar cewa yankin Kashmin inda Musulmai suke da rinjaye nasu ne, sai dai tuni aka raba musu yankin, tun lokacin da suka samu ‘yancin kai daga Birtaniya.
