Hukumar Lafiya ta Duniya ta sanar da amincewa da wani sabon maganin zazzabin cizon sauro da aka ƙera musamman domin jarirai da ƙananan yara. Maganin mai suna Artemether-lumefantrine shi ne na farko da aka tsara kai tsaye ga wannan rukuni, kuma an tabbatar yana cika ƙa’idojin duniya na inganci, tsaro da tasiri.
A baya, ana amfani da magungunan da aka yi wa manyan yara ne wajen jinyar jarirai, wanda ke ƙara haɗarin kuskuren kashi, illa da guba. Wannan sabon mataki na nufin rage waɗannan matsaloli, tare da cike gibin jinya da ke shafar kusan jarirai miliyan 30 da ake haifa kowace shekara a yankunan da cutar ta fi yawa, musamman a Afirka.
A shekarar 2024 kadai, an samu kimanin mutane miliyan 282 da suka kamu da cutar da kuma mutuwar sama da 610,000 a ƙasashe 80, inda Afirka ke ɗaukar kaso mafi yawa. Yara ‘yan ƙasa da shekara biyar ne suka fi fuskantar barazana, suna ɗaukar kusan kashi uku cikin huɗu na waɗanda ke mutuwa.
Duk da haka, yaƙi da cutar na fuskantar ƙalubale kamar juriya ga magunguna da maganin sauro, matsalolin gano cutar, da kuma raguwar tallafin kuɗi daga ƙasashen waje. Shugaban WHO, Tedros Adhanom Ghebreyesus, ya ce tsawon ƙarnuka cutar na raba iyaye da ‘ya’yansu, amma yanzu ana fara ganin sauyi saboda sabbin allurai, gwaje-gwaje da magunguna.
A ƙarshe, WHO ta ce wannan amincewa za ta sauƙaƙa sayen magungunan a hukumance, tare da tabbatar da cewa suna bin ƙa’idojin duniya, musamman a ƙasashen da ba su da cikakken tsarin kula da magunguna.
MAJIYAR LABARI: NEWSTIMEHUB
