Poland da Switzerland sun gudanar da tattaunawa domin ƙara ƙarfafa haɗin gwiwarsu a fannin horon soja da tsaro. Ministan tsaron Poland, Władysław Kosiniak-Kamysz, ya gana da takwaransa na Switzerland, Martin Pfister, a Warsaw, inda suka mayar da hankali kan yadda za su faɗaɗa haɗin kai a horon soja da kuma ci gaban masana’antar tsaro.
Muhimman batutuwan da suka fito a tattaunawar sun haɗa da tsaron intanet, basirar wucin gadi, da kuma tsarin jirage marasa matuƙi. Poland ta ce sojojinta sun riga sun shiga wasu shirye-shiryen horo a Switzerland, ciki har da horaswa kan tankokin Leopard da kuma atisayen rundunoni na musamman, abin da ke nuna cewa dangantakar tsaro tsakanin kasashen biyu ta riga ta fara karfi tun kafin wannan sabon mataki.
Kosiniak-Kamysz ya kuma nuna sha’awar tsarin kariyar fararen hula na Switzerland, yana kallonsa a matsayin wani tsari da Poland za ta iya koyo daga gare shi. A bangarensa, Martin Pfister ya ce Switzerland na son cin gajiyar gogewar Poland wajen tinkarar barazanar hadaka, yayin da ita kuma za ta bayar da ƙwarewarta a bincike da masana’antar tsaro. Sun kuma tattauna manyan batutuwan tsaro na duniya, ciki har da goyon baya ga Ukraine da halin da ake ciki a Gabas ta Tsakiya.
