Wani rahoto da kafar Bloomberg ta wallafa ya nuna cewa tattalin arzikin Isra’ila ya yi asarar fiye da dala biliyan 57 cikin shekaru biyu da suka gabata, sakamakon rikicin da take yi a Gaza da kuma hare-hare a Lebanon. Alƙaluman da babban bankin Isra’ila ya fitar sun nuna cewa asarar ta kai sehekl biliyan 177, wanda ya yi daidai da kashi 8.6 cikin 100 na GDP na ƙasar tsakanin 2023 zuwa 2025.
Rahoton ya bayyana cewa mafi yawan wannan asara na da alaƙa kai tsaye da kashe kuɗaɗen yaƙi da kuma tasirin rikicin a harkokin tattalin arziki. Haka kuma, bai haɗa da illar rikicin da ake yi da Iran ba, wanda har yanzu ke gudana, duk da cewa yaƙin kwanaki 12 da aka yi a watan Yuni ya rage GDP da kusan kashi 0.3 cikin 100.
A bangaren kasafin kuɗi, gwamnatin Isra’ila ta ƙara dala biliyan 13 a kasafin yaƙi na shekarar 2026, yayin da kuma aka lura da sauyi a harkokin cinikayya. Fitar da kayayyaki zuwa wasu manyan ƙasashen Tarayyar Turai ya ragu, inda aka samu faduwar dala biliyan 1 a 2024 da kuma dala biliyan 1.5 a 2025, alamar cewa matsalolin siyasa na iya shafar kasuwanci.
Tun bayan fara rikicin a Gaza a watan Oktoba 2023, an samu asarar rayuka da dama tare da lalacewar ababen more rayuwa na fararen hula, wanda ya ƙara dagula tattalin arzikin ƙasar da kuma yanayin yankin gaba ɗaya.
Majiyar Labari: NEWSTIMEHUB
