An samu katsewar intanet a faɗin Jamhuriyar Congo ranar Lahadi yayin da al’umma suka fita domin kaɗa ƙuri’a a zaɓen shugaban ƙasa. Ƙungiyar sa-ido kan harkokin intanet ta duniya, NetBlocks, ta bayyana cewa bayanan cibiyoyi sun nuna cewa an samu tangarda ga haɗin intanet a duk ƙasar jim kaɗan bayan fara jefa ƙuri’a.
An buɗe rumfunan zaɓe da ƙarfe 6 na safe agogon ƙasar, kuma ana sa ran rufe su da ƙarfe 6 na yamma. Fiye da mutane miliyan 2.6 ne aka yi rajista domin su kaɗa ƙuri’arsu a wannan zaɓe.
NetBlocks ta kuma tunatar da cewa makamancin katsewar intanet kusan gaba ɗaya ya faru a zaɓen shugaban ƙasar na 2021, inda aka yanke sadarwar intanet na kusan kwanaki uku.
Shugaban ƙasar mai ci, Denis Sassou Nguesso, na neman sake wani wa’adi bayan ya shafe shekaru da dama a mulki. Ya fara hawa karagar mulki a 1979, ya sha kaye a zaɓen 1992, sannan ya dawo mulki a 1997 bayan wani bore da ya kifar da tsohon Firayim Minista Pascal Lissouba. A wannan zaɓen kuma yana fuskantar kalubale daga ‘yan takara shida ciki har da Mabio Mavoungou Zinga da kuma ɗan majalisa mai gogewa Joseph Kignoumbi Kia Mboungou.
