Rundunar sojin Amurka ta sanar cewa wani jirginta na soji samfurin KC-135 ya faɗi a yammacin Iraƙi yayin wani aiki, yayin da wani jirgin makamancin sa ya samu sauƙa lafiya. Cibiyar tsaron Amurka ta CENTCOM ta ce lamarin bai faru sakamakon harin abokan gaba ba.
Jiragen KC-135 dai ana amfani da su ne domin bai wa sauran jiragen yaƙi mai a sararin samaniya. Jirgin yana ɗaukar ma’aikata uku — matuƙan jirgi biyu da kuma jami’in da ke sarrafa bututun mai — amma a wasu lokuta yana iya ɗaukar fasinjoji har 37, kamar yadda rundunar sojin saman Amurka ta bayyana.
Wannan shi ne aƙalla jirgi na huɗu da Amurka ta rasa tun bayan fara rikicin da Iran a ranar 28 ga Fabrairu. A baya dai an harbo wasu jiragen yaƙin Amurka samfurin F-15 uku a sararin samaniyar Kuwait, duk da cewa jami’an da ke cikin jiragen sun samu damar tserewa.
A lokacin, rundunar sojin Amurka ta ce jiragen sun fuskanci hare-hare daga makamai masu linzami da jiragen sama marasa matuƙa na Iran yayin gudanar da ayyukan yaƙi a yankin.
