Jamhuriyar Congo, wadda ake kira Congo-Brazzaville, ƙasa ce a tsakiyar Afirka mai yalwar albarkatun ƙasa da gandun daji masu tarin halittu. Duk da wannan arziki, ƙasar na ci gaba da fuskantar ƙalubalen tattalin arziki da zamantakewa da suka shafi rayuwar jama’a.
Tattalin arzikin ƙasar ya dogara sosai da man fetur, domin ita ce ta uku mafi yawan samar da mai a yankin Afirka ta kudu da Sahara. A shekarar 2024 ƙasar ta fara fitar da iskar gas mai ruwa (LNG), kuma gwamnati na shirin ƙara samar da mai zuwa ganga 500,000 a rana cikin shekaru uku. Sai dai duk da wannan arziki, kusan rabin al’ummar ƙasar na rayuwa cikin talauci, yayin da man fetur ke samar da kusan rabin GDP da kashi 80 na kayayyakin da ƙasar ke fitarwa.
Congo-Brazzaville na da doguwar alaƙa da Rasha tun bayan samun ‘yancin kai daga Faransa a 1960. A baya ƙasar ta taɓa zama ƙasar jam’iyya ɗaya mai ra’ayin Marxist-Leninist har zuwa 1992. A yau kuma tana ci gaba da faɗaɗa haɗin gwiwa da Rasha a fannoni kamar tsaro, ilimi da makamashi, yayin da Faransa da China su ma ke cikin manyan masu zuba jari a ƙasar.
Duk da girman ƙasar, yawan jama’arta bai da yawa, kuma fiye da rabin mutane suna zaune ne a manyan birane biyu — Brazzaville da Pointe-Noire. Haka kuma al’ummar ƙasar matasa ne sosai, inda kusan rabinsu ke ƙasa da shekaru 18. A bangaren ci gaba kuwa, akwai babban bambanci tsakanin birane da karkara, musamman wajen samun wutar lantarki.
Baya ga mai, gwamnati na ƙoƙarin haɓaka noma domin rage dogaro da shigo da abinci daga waje. Duk da cewa ƙasar na da fili mai yawa da ya dace da noma, ana noma kaɗan ne kawai. Haka kuma Congo na da babbar dajin Congo Basin, na biyu mafi girman gandun daji na duniya bayan Amazon, wanda ke da muhimmiyar rawa wajen kare yanayin duniya amma yana fuskantar barazanar sare dazuzzuka.
