Shugaban Amurka Donald Trump ya bayyana cewa kasarsa na ci gaba da tattaunawa da “mutanen da suka dace” a Iran, yana mai cewa Tehran na nuna sha’awar cimma yarjejeniya domin kawo karshen yakin da ke gudana. Duk da cewa ya ce “ba kowa ya san wanda ya kamata a yi magana da shi ba,” Trump ya jaddada cewa Amurka na hulda da bangaren da ya dace kuma akwai yiwuwar samun matsaya.
Wannan bayani ya zo ne bayan wani rahoto da CNN ta fitar, wanda ya nuna cewa Amurka ta tuntubi Iran ta hanyoyi daban-daban domin duba yiwuwar cimma yarjejeniya, duk da cewa ba a kai ga fara tattaunawar hukuma ba tukuna. A halin yanzu, hare-haren sama da Amurka da Isra’ila ke kaiwa Iran tun daga ranar 28 ga Fabrairu sun yi sanadin mutuwar mutane sama da 1,340, ciki har da tsohon jagoran koli Ali Khamenei.
A martanin Iran kuwa, ta kai hare-hare da jiragen drone da makamai masu linzami kan Isra’ila da wasu kasashe kamar Jordan, Iraq da kasashen Gulf masu dauke da sansanonin sojin Amurka. Wadannan hare-hare sun haddasa asarar rayuka da lalacewar kayayyakin more rayuwa, tare da janyo cikas ga kasuwannin duniya da zirga-zirgar jiragen sama.
Haka kuma, rikicin ya kara tsananta tun bayan da Isra’ila ta fadada hare-harenta zuwa Lebanon a farkon watan Maris, inda ta kai hare-hare a Beirut da wasu yankuna kafin fara wani karamin farmakin kasa. Wannan duka na nuna yadda rikicin yankin ke kara rikidewa tare da kara barazana ga zaman lafiya.
