Nigeria imethibitisha mgonjwa wa kwanza wa Ebola katika mlipuko wa hivi karibuni wa ugonjwa huo barani Afrika. Mgonjwa huyo ni mwanamke aliyesafiri kutoka Uganda kwenda Abuja, mji mkuu wa Nigeria, serikali ya nchi hiyo imethibitisha siku ya Jumanne.
Tangu mlipuko mkubwa wa Ebola utangazwe katika Jamhuri ya Kidemokrasia ya Congo mwezi Mei, homa hiyo hatari ya virusi inayosababisha kuvuja damu imeenea katika nchi kadhaa barani humo, ikiwemo nchi jirani ya Uganda na Kenya.
Katika taarifa yake, Waziri wa Afya wa Nigeria, Muhammad Ali Pate, alisema: “Mgonjwa huyo ni mwanamke aliyewasili Nigeria hivi karibuni kwa ndege ya kimataifa kutoka Uganda. Alilazwa katika hospitali, ambako alipatiwa matibabu kwa siku kadhaa kabla ya kuthibitishwa kuwa ameambukizwa Ebola.”
Aliongeza kuwa mgonjwa huyo kwa sasa ametengwa na wagonjwa wengine na anaendelea kupata matibabu.
Watu 44 waliokuwa na mawasiliano ya karibu na mgonjwa wafuatiliwa
“Ufuatiliaji wa waliokuwa na mawasiliano ya karibu umeanza kwa watu 44 hivi sasa,” taarifa hiyo iliongeza, “huku maafisa afya wakiendelea kuwabaini na kuwafuatilia watu ambao huenda walikabiliwa na hatari ya kuambukizwa, wakiwemo wahudumu wa afya, wagonjwa wengine, walezi na watu waliosafiri pamoja au waliokuwa na mawasiliano naye wakati wa safari”.
Kwa upande mwingine, mamlaka za Jamhuri ya Kidemokrasia ya Congo zimeripoti takriban maambukizi 9,400 ya Ebola, na vifo vya zaidi ya watu 4,500. Kwa mujibu wa taarifa hiyo, huu ndio mlipuko uliosababisha vifo vingi zaidi katika historia ya nchi hiyo.
Nayo Wizara ya Afya ya Kenya ilithibitisha mtu wa tisa kuambukizwa na ugonjwa wa Ebola siku ya Jumanne.
