Ministan harkokin wajen Faransa, Jean-Noël Barrot, ya isa Jamhuriyar Afirka ta Tsakiya (CAR), a wata ziyara da ta zama ta farko da wani babban jami’in Faransa ya kai ƙasar cikin shekaru bakwai. Ministan harkokin wajen CAR, Sylvie Notefe, ce ta tarbe shi a Bangui, a wani yunƙuri na farfaɗo da dangantakar diflomasiyya tsakanin ƙasashen biyu.
Ziyarar ta zo ne bayan sake buɗe tattaunawar diflomasiyya tsakanin Shugaban Faransa Emmanuel Macron da shugaban CAR Faustin-Archange Touadéra a watan Afrilu 2024, bayan shekaru na rashin jituwar siyasa tsakanin Paris da Bangui.
Ana sa ran Barrot zai gana da Shugaba Touadéra, wanda kwanan nan ya dawo daga ziyarar mako guda a Moscow inda ya gana da shugaban Rasha Vladimir Putin. Wannan na nuna yadda CAR ke ƙoƙarin daidaita hulɗa da manyan ƙasashe.
A halin yanzu, CAR na ci gaba da fuskantar matsalolin tsaro, kuma gwamnatin Touadéra na dogaro sosai da mayakan haya na kungiyar Wagner ta Rasha domin tallafin tsaro. Rahotanni sun nuna cewa a maimakon haka kungiyar ta samu kwangiloli masu riba a fannoni kamar zinariya, lu’u-lu’u da gandun daji, abin da ke nuna gasa tsakanin manyan ƙasashe wajen tasiri a yankin.
