Shugaban Faransa Emmanuel Macron ya bayyana cewa Rasha na kuskure idan tana tunanin rikicin da ke gudana a Iran zai ba ta damar samun sauƙi a yaƙin da take yi da Ukraine. Macron ya faɗi hakan ne a wani taron manema labarai tare da shugaban Ukraine Volodymyr Zelensky a fadar Élysée, inda ya jaddada cewa goyon bayan Faransa da ƙawayenta ga Ukraine ba zai ragu ba duk da tashin hankalin da ke ƙara ƙaruwa a Gabas ta Tsakiya.
Macron ya ce yaƙin Ukraine ya shiga shekara ta biyar kuma ba za a bari hankalin duniya ya kauce daga rikicin ba. Ya kuma nuna alaƙar da ke tsakanin Rasha da Iran, yana cewa ƙasashen biyu na da dangantaka ta tarihi da ta soja, kuma an riga an yi amfani da jiragen yaƙi marasa matuƙa na Iran a hare-haren da ake kai wa Ukraine.
Shugaban Faransa ya jaddada cewa matsayar ƙasarsa a rikicin yankin ita ce kare kai da kuma taimaka wa ƙawayenta kawai. Ya kuma yi Allah wadai da wani hari na drone da masu goyon bayan Iran suka kai a yankin Erbil na arewacin Iraki, wanda ya yi sanadin mutuwar wani sojan Faransa.
A bangaren diflomasiyya, Macron ya ce Faransa da ƙawayenta za su ƙara matsa lamba kan Moscow domin tilasta mata shiga tattaunawa ta gaskiya. Ya bayyana cewa ana shirin sabon kunshin takunkumi na 20 kan Rasha, tare da ƙoƙarin dakile hanyoyin da ake bi domin kauce wa takunkumin, ciki har da jiragen ruwa da ake kira “ghost fleet” da Rasha ke amfani da su wajen fitar da mai.
Majiyar Labari: NEWSTIME
