Ma’aikatan aikin ceto na Turkiyya sun fara ayyuka a ranar Lahadi a Venezuela bayan girgizar ƙasa biyu masu ƙarfi da suka faru a ƙasar.
Ma’aikata daga Hukumar Kula da Ayyukan Gaggawa da Kiyaye Afkuwar Bala’o’i ta Turkiyya (AFAD) da Rundunar Sojin Turkiyya sun isa La Guaira, ɗaya daga cikin wuraren da girgizar ƙasa ta fi yi wa illa.
Daga nan sai jami’an suka koma unguwar La Paez bayan sun karɓi rahotannin cewa mutane na iya kasancewa har yanzu da rai ƙarƙashin ɓaraguzan gini mai hawa 14 da ya rushe.
Ana gudanar da ayyukan bincike da ceto tare da haɗin gwiwar ƙungiyoyin ƙasa da ƙasa da ke aiki a yankin.
Mazauna sun ce ginin da ya rushe yana da ɗakuna 43, daga cikinsu 41 akwai mutane a zaune.
Sannan sun ƙara da cewa wasu mutane an riga an ceto su da rai daga ɓaraguzan, kuma wani da aka ceto ya bayar da bayanai game da wasu da suka rage makale ƙarƙashin ɓaraguzan.
A daren Laraba, Hukumar Binciken Ƙasa ta Amurka (USGS) ta ruwaito cewa an samu girgizar ƙasa guda biyu a Venezuela, waɗanda suka faru da tazara ta sakan 39, masu girman 7.2 da 7.5.
Girgizar ƙasar ta janyo rushewar gine-gine a babban birnin Caracas da cikin jihohi da dama, ciki har da Miranda, La Guaira, Aragua, Carabobo da Falcon.
Adadin mutanen da suka mutu ya ƙaru zuwa 1,430, in ji Shugaban Majalisar Ƙasa Jorge Rodriguez a ranar Asabar.
