Jamus ta sauya matsayinta a shari’ar da Afirka ta Kudu ta kai Isra’ila a Kotun Kasa da Kasa (ICJ), inda ta janye shirin goyon bayan Isra’ila. Hukumomin Berlin sun ce ba za su shiga shari’ar ba, suna mai cewa yanzu sun fi mayar da hankali kan wata kara da Nicaragua ta shigar da ke zargin Jamus da taimakawa Isra’ila ta hanyar samar da makamai.
Tun farko, Jamus ta yi watsi da zargin kisan kare dangi da Afirka ta Kudu ta gabatar, tana mai cewa ba shi da tushe, kuma ta nuna niyyar goyon bayan Isra’ila. Sai dai shigar da kara daga Nicaragua ya kara jefa Jamus cikin matsin lamba na kasa da kasa, wanda ya sa ta dauki sabon matsayi mai taka-tsantsan.
Duk da haka, jami’an Jamus sun ci gaba da musanta zargin da ake yi musu, suna jaddada cewa za su jira hukuncin kotu kafin daukar wani matsayi na karshe. Wannan sauyi na nuna yadda rikicin ke kara rikitar da matsayai na kasashen duniya.
Lamarin na zuwa ne yayin da halin da ake ciki a Gaza ke ci gaba da jawo damuwa a duniya, inda ake sa ran shari’ar ICJ za ta taka muhimmiyar rawa wajen yadda kasashen duniya za su mayar da martani.
Majiyar Labari: NEWSTIMEHUB
