Jaji wa mahakama ya Boston nchini Marekani siku ya Jumanne aliruhusu serikali ya Trump kuwafutia kinga ya kupinga kurudishwa kwao raia karibu 5,000 wa Ethiopia, kuweka misingi wa kuwaondolea Hadhi ya Kinga ya Muda (TPS).
Jaji Brian Murphy alifuta hukumu ya awali iliowaruhusu raia hao kuendelea kuishi Marekani, uamuzi uliopongezwa na maafisa wa Wizara ya Mambo ya Ndani (DHS). “Jaji Brian Murphy ameondoa kinga ya muda ya raia wa Ethiopia. Kinga zote za muda zimeondolewa!” Mwanasheria Mwandamizi wa Wizara ya Mambo ya Ndani James Percival aliandika kwenye mtandao wa X.
Waziri wa Mambo ya Ndani Markwayne Mullin alitoa onyo kwa wale wanaoathirika na hukumu hiyo. “Ni Hadhi ya Kinga ya Muda ni hivyo — ya muda,” Mullin aliandika, akiongeza kuwa watu ambao muda wao wa kuishi Marekani umemalizika kwa sasa wako nchini kinyume cha sheria. Alieleza kuwa wana hiari: “waondoke nchini mara moja au watimuliwe haraka sana.”
Hatua hii inafuatia kauli za aliyekuwa Waziri wa Mambo ya Ndani Kristi Noem kuwa nchi hiyo ya Pembe ya Afrika haikidhi tena vigezo vya Hadhi ya Kinga ya Muda, na kuwa hadhi hiyo ingeondolewa kufikia Februari 13, 2026. Hata hivyo, Januari 30, jaji mmoja wa Massachusetts akafuta agizo lake.
Uamuzi huu ni sawa na ule wa mwezi Juni wa Mahakama ya Juu ambao uliruhusu serikali kufuta hadhi ya kinga kwa maelfu ya raia kutoka Haiti, Syria, Sudan Kusini, na Somalia.
