Maafisa katika Jamhuri ya Kidemokrasia ya Congo walisasisha idadi ya waliofariki kutokana na mlipuko wa Ebola hadi 204 Jumamosi jioni, saa chache baada ya Shirika la Msalaba Mwekundu kusema watu watatu wahudumu wa kujitolea walifariki huko na Uganda kuthibitisha visa vitatu vipya vya Ebola.
Taarifa ya wizara ya afya ilisema vifo 204 vimerekodiwa katika majimbo matatu ya nchi hiyo kubwa ya Afrika ya kati, kutoka kwa maambukizi 867 ynayoshukiwa. Idadi ya mwisho ya Shirika la Afya Ulimwenguni mnamo Ijumaa iliweka idadi ya vifo kuwa 177 kutoka kwa maambukizi 750 yanayoshukiwa.
Shirika la Afya Ulimwenguni limetangaza mlipuko wa homa ya kuvuja damu inayoambukiza sana kuwa dharura ya kimataifa.
Maambukizi nchini Uganda
Siku ya Jumamosi, shirika la afya la Umoja wa Afrika lilionya kuwa nchi nyingi zaidi barani humo ziko katika hatari ya kuathiriwa na virusi vya Ebola, mbali na DRC na Uganda.
“Tuna nchi 10 zilizo hatarini,” alisema Jean Kaseya, Mkuu wa Vituo vya Afrika vya Kudhibiti na Kuzuia Magonjwa (Africa CDC), akiorodhesha Angola, Burundi, Jamhuri ya Afrika ya Kati, Jamhuri ya Congo, Ethiopia, Kenya, Rwanda, Sudan Kusini, Tanzania na Zambia.
Kaseya alisema “uhamaji mkubwa na ukosefu wa usalama” katika mkoa huo ulikuwa unasaidia kueneza ugonjwa huo.
Visa vipya vilivyothibitishwa nchini Uganda siku ya Jumamosi vinafikisha jumla ya watu watano waliothibitishwa katika nchi hiyo ya Afrika Mashariki tangu kugunduliwa huko na DRC Mei 15. Mtu mmoja amefariki nchini Uganda.
WHO yaongeza kiwango cha hatari kuwa ‘sana’
Wizara ya afya ilibainisha wagonjwa wapya kuwa dereva wa Uganda, mfanyakazi wa afya wa Uganda na mwanamke kutoka DRC. Wote wako hai.
Ebola ni ugonjwa hatari unaosababishwa na virusi unaoenezwa kwa kugusana moja kwa moja na maji au vitu vya mwili vya mgonjwa. Unaweza kusababisha kuvuja damu kwa wingi na kushindwa kwa viungo.
Mlipuko wa sasa unajikita mashariki mwa DRC, eneo lililoharibika na migogoro, ambapo ugonjwa uligunduliwa katika mkoa wa Ituri, ambao una mpaka na Uganda, kabla ya kuenea hadi Kivu Kusini.
Ijumaa, WHO iliongezea kiwango cha hatari ya Ebola nchini DRC hadi kiwango chake cha juu kabisa – “sana”. Ilisema hatari katika Afrika ya Kati ilikuwa “kubwa” lakini hatari ya kimataifa ilibaki “chini”.
Wataalamu wanadhani mlipuko, ambao unaweza kuwa umekuwa ukizunguka bila kutambuliwa kwa muda, unasababishwa na tawi la Bundibugyo, ambalo ni aina isiyo ya kawaida na kwa ajili yake hakuna chanjo au tiba iliyothibitishwa. Ebola imewaua zaidi ya watu 15,000 barani Afrika katika miaka hamsini iliyopita.
