Gomman sojoji ne aka kashe a hare-haren ‘yanta’adda a wurare biyu a Jamhuriyar Nijar, in ji majiyoyi na tsaro, lamarin da ke bayyana cigaban ƙalubale da ke fuskantar gwamnatin ƙasar a yaƙin da take yi da ƙungiyoyin ‘yanta’adda.
Hari na farko ya faru ne ranar Laraba, a lokacin da aka yi wa wani jerin gwanon sojoji kwanton-ɓauna kusa da garin Abala-Filingué, in ji majiyoyin.
Wani hari na daban kuma ya faru ne ranar Lahadi a Birni-N’Konni, inda rahotanni suka ce an kashe sojoji fiye da 30.
Majiyoyin sun danganta hare-haren biyu ga ‘yanta’adda amma ƙarin bayanai ƙalilan ne kawai suka bayar game da lamurran.
Ƙungiyar SITE Intelligence Group mai bibiyar harkokin masu ra’ayin fifita fararen-fata kan kowa da masu iƙirarin jihadi a intanet, ta ce ƙungiyar ta’addanci ta Daesh wadda ke aika-aika a Yammacin Afirka, ta fitar da sanarwa biyu ranar Lahadi inda ta ɗauki alhakin kai hare-haren.
Tashin hankali na baya bayan nan na zuwa ne cikin damuwa a Nijar, inda ƙungiyoyin ‘yanta’adda ke ci gaba da kai hare-hare duk da ƙoƙarin hukumomin soji na ƙarfafa tsaron ƙasar.
A watan Janairu, ƙungiyar mai alaƙa da Daesh ta kai hari a wani filin jirgin sama na fararen-hula da kuma wani sansanin sojin sama a babban birnin ƙasar Nijar, Yamai.
A watan da ya gabata, sojoji masu bore sun kai hari filin jiragen saman da kuma fadar shugaban ƙasar, lamarin da ya haddasa arangama da dakarun da ke biyayya ga gwamnati. Gwamnatin Nijar ta ɗora wa Faransa alhakin harin, wani iƙirarin da Faransa ta musanta.
