Sojojin ruwa na Birtaniya (Royal Navy) na shirin taka muhimmiyar rawa wajen jagorantar wata ƙungiyar ƙasashe domin sake buɗe mashigar Hormuz, wacce ke da matuƙar muhimmanci ga zirga-zirgar jiragen ruwa na duniya. Rahotanni sun nuna cewa ana duba yiwuwar tura wani jirgin soja ko wani jirgi na musamman da zai zama cibiyar sarrafa na’urorin zamani marasa matuƙa domin gano da kuma lalata bama-baman ruwa.
Wannan shiri na cikin wani faɗaɗɗen yunƙuri na ƙasashe da dama, ciki har da Amurka da Faransa, domin tabbatar da tsaron jiragen kasuwanci musamman masu ɗaukar mai. An tsara aikin ya gudana a matakai, inda za a fara da binciken bama-baman ruwa ta amfani da na’urorin zamani, kafin daga baya a tura jiragen ruwa marasa matuƙa da kuma manyan jiragen yaƙi irin su Type 45 domin kare jiragen mai.
Jami’an tsaro na Birtaniya sun bayyana cewa suna da fasahohin zamani na gano bama-baman ruwa ba tare da jefa rayukan mutane cikin haɗari ba. Haka kuma, suna zargin cewa an riga an shimfiɗa wasu bama-baman ruwa a yankin, duk da cewa wasu jiragen kasashen duniya na ci gaba da amfani da mashigar.
Wannan lamari na faruwa ne yayin da rikicin Gabas ta Tsakiya ke ƙara tsananta bayan hare-haren da Amurka da Isra’ila suka kai kan Iran, wanda ya janyo martani daga Tehran ta hanyar kai hare-hare da drones da makamai masu linzami. Mashigar Hormuz, wacce kusan ganga miliyan 20 na mai ke bi ta kullum, ta fuskanci tangarda tun farkon watan Maris, lamarin da ya haifar da tashin farashin mai da kuma tsadar jigilar kaya a duniya.
