Amurka a ranar Jumma’a ta ce ta bai wa rundunar sojin Nijar gudunmawar kwantena tara ta kayan aikin soja da darajarsu ta kai kusan dala miliyan 2.3 domin tallafa wa ayyukan yaƙi da ƙungiyoyin masu aikata laifuka da na ‘yanta’adda.
A cewar wata sanarwa daga Ofishin Jakadancin Amurka da ke Niamey, an miƙa kayan ne ranar 26 ga Mayu, kuma sun haɗa da kayan sawa na soja, kayan kariya da kuma kayan kiwon lafiya.
Wannan tallafin na nuna ci gaba da haɗin gwiwar tsaro tsakanin Washington da yankin Sahel duk da takun-saƙar da ke tsakaninta da gwamnatocin yankin.
Gwamnatin Trump tana mai mayar da hankali kan muradun tsaro na haɗin gwiwa yayin da ƙungiyoyin ‘yanta’adda masu alaƙa da al-Qa’ida ke faɗaɗa tasirinsu a fadin Afirka ta Yamma.
A watan Fabrairu, Washington ta ɗage takunkumi kan manyan jami’ai uku na Mali saboda alaƙarsu da rukunin sojojin haya na Rasha, Wagner, abin da ya nuna wani sauyi zuwa haɗin gwiwa mai amfani a yankin.
Nijar, tare da makwabtan ta Mali da Burkina Faso, sun fuskanci shekaru na hare-haren ‘yanta’adda da suka kashe dubban mutane kuma suka tilasta miliyoyin mutane zama ‘yan gudun hijira.
A ‘yan watannin da suka gabata tashin hankali ya ƙaru a kan iyakokin Nijar, Benin da Nijeriya, inda ‘yanta’adda suka maida hanyoyin sufuri na nesa zuwa wuraren rikici.
A baya Amurka ta gudanar da sansanin jiragen sama marasa matuki a Nijar wanda ya kai darajar dalar Amurka miliyan 100, inda kimanin sojoji 1,000 ke sa ido kan ayyukan ‘yanta’adda a fadin Sahel.
Amma an rufe sansanin a 2024 bayan Nijer ta nemi janyewar sojojin Amurka, wani ɓangare na yunkurin yankin na rage kasancewar sojojin kasashen Yamma don fifita sabbin abokan haɗin gwiwa, ciki har da tare da Rasha.
