Shugabannin addinin Musulunci da Kiristanci fiye da 50 sun rattaba hannu kan wata yarjejeniyar zaman lafiya tsakanin addinai a Abuja, inda suka ƙaddamar da wata sabuwar ƙungiya da za ta yi aiki wajen inganta zaman lafiya da fahimtar juna tsakanin mabiya addinai a faɗin Nijeriya.
Fiye da mutane miliyan 200 ne ke zaune a Nijeriya, kuma al’ummar ƙasar ta kasu kusan daidai tsakanin arewa, inda Musulmi suka fi yawa, da kudancin ƙasar, inda Kiristoci suka fi yawa. Haka kuma akwai wasu al’ummomi da ke gudanar da addinan gargajiya.
A shekarar da ta gabata, gwamnatin Nijeriya ta musanta ikirarin Shugaban Amurka Donald Trump cewa Kiristanci na fuskantar wata “barazana mai girma ga wanzuwarsa” a ƙasar da ke Yammacin Afirka.
Masana sun sha yin watsi da ikirarin cewa ana gudanar da “kisan kiyashin Kiristoci” a Nijeriya, inda suka ce rikice-rikicen da ake fama da su a ƙasar sun kashe Musulmi da Kiristoci ba tare da nuna bambanci ba.
Ba a ambaci kalaman Trump ba a cikin sanarwar yarjejeniyar da aka rattaba wa hannu a hukumance ba a ranar Laraba a wani taro da Ƙungiyar Ƙasashen Musulmi ta Duniya (Muslim World League) ta shirya.
Muslim World League ƙungiya ce mai zaman kanta ta Musulunci da ke da hedikwata a Saudiyya.
‘Mun buɗe sabon shafi’
Sai dai gwamnatin Nijeriya da wasu ƙungiyoyi daban-daban sun ci gaba da ƙoƙarin nuna ci gaba wajen magance matsalar tsaro tun bayan kalaman Trump.
Babban Sakataren Muslim World League, Mohammad Al-Issa, ya ce akwai ƙwarin gwiwa daga mabiya addinan biyu wajen “buɗe sabon shafi.”
Ya ce, “Ba mu musanta cewa tsattsauran ra’ayi ya cutar da kowa ba; kowa ya fuskanci illar hakan.”
Shugabannin Kiristoci da Musulmi daga Nijeriya sun bayyana yarjejeniyar a matsayin wani sauyi mai muhimmanci.
John Praise Daniel, shugaban Northern Christian Religious Leaders’ Assembly, ya ce yana fatan yarjejeniyar za ta taimaka wajen dakile kalaman da ke raba kan al’umma daga wasu malaman addini.
Ya ce, “Babu kalaman ƙiyayya, babu rashin girmama sauran ƙungiyoyin addini, kuma babu kiran mutane da kafirai.”
‘Mu yi aiki tare’
Sakatare Janar na Jama’atu Nasril Islam, Khalid Abubakar, ya ce: “Ba kira ba ne na ka bar addininka, a’a, kira ne na haɗin kai da yin aiki tare cikin jituwa.”
Mataimakin Shugaban Majalisar Dattawan Nijeriya, Barau Jibrin, ya wakilci Shugaba Bola Tinubu a wajen bikin rattaba hannu kan yarjejeniyar. Gwamnonin jihohin arewacin Nijeriya uku ma sun halarci taron.
Jibrin ya ce a ranar farko ta taron na kwanaki biyu: “Gwamnati ta kuduri aniyar tabbatar da cewa mun kasance ƙasa guda mai haɗin kai, duk da bambance-bambancenmu, ko wane irin bambanci ne.”
