Sulemana Abdul Samed, anayeaminika kuwa mtu mrefu zaidi nchini Ghana, amefariki dunia akiwa na umri wa miaka 32, shirika la habari la taifa (GBC), limetangaza siku ya Jumatatu.
Abdul Samed, kwa jina maarufu Awuche, alifariki wakati akitibiwa katika Hospitali ya Tamale kanda ya kaskazini nchini humo, GBC iliripoti.
Chanzo cha kifo cha Awuche hakikufahamika mara moja.
Alikuwa na urefu wa futi 7 na inchi 4 na mara nyingi alisumbuliwa na changamoto za kiafya kutokana na kimo chake.
Changamoto hizi za kiafya zilimsababishia Awuche kulazwa hospitali mara kwa mara, na mwaka 2022 kukawa na wito wa mchango katika kusaidia kulipa gharama za matibabu yake.
Awuche alisoma shule kaskazini mwa Ghana na baadaye kufanya kazi ya fundi magari.
