Shugaban mulkin soja na Mali, Assimi Goïta, ya bayyana cewa gwamnati na da iko da al’amura duk da manyan hare-hare da suka girgiza ƙasar cikin kwanaki. Hare-haren da aka kai sun kasance daga cikin mafi muni a ‘yan shekarun nan, inda suka shafi muhimman sansanonin sojoji har ma da wurare kusa da babban birnin Bamako.
Rahotanni sun nuna cewa ‘yan ta’adda masu alaƙa da jihadi da kuma ‘yan aware na Tuareg sun hada kai wajen kai wadannan hare-hare, duk da cewa a baya suna gaba da juna. An kashe sama da mutane 20 a rikicin, ciki har da Ministan Tsaro, Sadio Camara. Kungiyoyin da ake zargi sun hada da Azawad Liberation Front da kuma kungiyar JNIM mai alaka da al-Qaeda.
Daya daga cikin manyan asarar da sojoji suka yi shi ne rasa iko da yankin Kidal, wanda ke da muhimmanci a arewacin ƙasar. Rahotanni sun nuna cewa sojojin da ke samun goyon bayan Rasha, ciki har da mayakan haya, sun janye daga yankin.
Goïta ya fito fili bayan kwanaki na shiru, yana kira ga jama’a da su kwantar da hankalinsu tare da haɗin kai, yana mai cewa ana ci gaba da kai farmakin soja domin dawo da tsaro. A gefe guda, kungiyoyin jihadi sun yi barazanar killace hanyoyin shiga Bamako, lamarin da ke ƙara tayar da hankalin jama’a.
Masana na ganin hare-haren kusa da babban birni na iya zama dabarar jan hankali domin bai wa ‘yan tawayen damar ƙarfafa ikonsu a arewa. Duk da ikirarin gwamnati na cewa komai na karkashin iko, har yanzu akwai fargaba kan makomar tsaro da zaman lafiya a Mali.
MAJIYAR LABARI: NEWSTIMEHUB
