Shugaban Majalisar Ɗinkin Duniya, Antonio Guterres, ya yi kakkausar suka kan wani hari da jirgin mara matuƙi ya kai kan asibiti a Sudan, wanda ya yi sanadin mutuwar akalla mutane 60, ciki har da yara da ma’aikatan jinya. Harin ya auku ne a asibitin jami’ar El-Daein da ke jihar East Darfur a ranar 20 ga Maris.
A cewar Majalisar Ɗinkin Duniya, irin wadannan hare-hare sun zama ruwan dare tun bayan barkewar rikicin a watan Afrilu 2023. Hukumar Lafiya ta Duniya ta tabbatar da cewa an kai hare-hare sama da 200 kan cibiyoyin lafiya, wanda ya jawo mutuwar fiye da mutane 2,000 a fadin kasar.
Guterres ya bukaci bangarorin da ke rikici da su mutunta dokokin jin kai na kasa da kasa, musamman kare fararen hula, ma’aikatan lafiya da cibiyoyin jinya. Ya jaddada cewa kai hari kan wadannan wurare ya saba da dokokin duniya kuma dole ne a dakatar da shi.
Hakazalika, ya yi kira ga bangarorin da su dakatar da fada nan take tare da amincewa da tsagaita wuta, yana mai karfafa gwiwar komawa kan teburin sulhu karkashin jagorancin Majalisar Ɗinkin Duniya domin samar da zaman lafiya mai dorewa.
Majiyar Labari: NEWSTIMEHUB
