Wani alkalin Faransa na Kotun Manyan Laifuka ta Duniya (ICC), Nicolas Gouyou, ya bayyana cewa rayuwarsa ta rikice bayan da Amurka ta sanya shi cikin jerin takunkumi. Ya ce ba zai iya amfani da katin kiredit dinsa ba ko yin sayayya a yanar gizo, yana mai cewa kusan duk tsarin biyan kudi a Faransa suna karkashin tasirin Amurka.
Gouyou ya ce yanzu ba zai iya amfani da Amazon, Airbnb, Booking ko Expedia ba, yana mai kwatanta halin da yake ciki da komawa shekaru 30 baya kafin zamanin dijital. Ya kuma kara da cewa yana ganin zai ci gaba da kasancewa a cikin jerin takunkumin tsawon lokacin mulkin Donald Trump na biyu.
Rahotanni sun nuna cewa Shugaban Faransa Emmanuel Macron ya aike da wasiku da dama ga Amurka domin a dage takunkumin, amma har yanzu babu wani martani mai kyau daga Washington. Hukumomin Faransa sun ce suna ci gaba da kokarin warware matsalar ta hanyar diflomasiyya.
Alkalin ya yi gargadi cewa irin wannan mataki na iya yin illa ga dimokuradiyya, yana mai cewa idan masu gabatar da kara, lauyoyi da alkalan kotu suka fara tsoro wajen yin aikinsu, to tsarin dimokuradiyya zai durkushe.
Lamarin ya biyo bayan sammacin kama da ICC ta bayar a 2024 kan Firaministan Isra’ila Benjamin Netanyahu da tsohon ministan tsaro Yoav Gallant, bisa zargin aikata laifukan yaki da na cin zarafin bil’adama a Gaza. Rikicin Gaza ya yi sanadin mutuwar dubban mutane da lalata mafi yawan gine-ginen yankin, tare da ci gaba da hare-hare duk da yarjejeniyar tsagaita wuta.
Majiyar Labari: NEWSTIMEHUB
