Kungiyar Save the Children ta yi gargadin cewa magunguna da ake kai wa cibiyoyin lafiya a Sudan na iya ƙarewa cikin makonni biyu kacal idan ba a samu hanyar kai su cikin gaggawa ba. Wannan matsala na da nasaba da rikicin Gabas ta Tsakiya, wanda ya haddasa tsaikon jigilar kaya da rufe hanyoyin jiragen sama da na ruwa.
Rahotanni sun nuna cewa magunguna masu darajar dala 600,000 sun makale a tashoshin jiragen ruwa na Dubai, yayin da kusan cibiyoyin lafiya 90 a Sudan ke dogaro da wadannan kayayyaki domin kula da marasa lafiya kusan 400,000. Wadannan cibiyoyi ba su da wata hanyar samun madadin magunguna a cikin ƙasar.
Jami’ai sun ce idan ba a dauki matakin gaggawa ba, marasa lafiya za su rasa damar samun kulawar lafiya ta asali, musamman ganin cewa Sudan na fama da rikici na shekaru uku da ya haddasa babbar matsalar jin kai. Haka kuma, cututtuka da dama na barazana yayin da ake fuskantar ƙarancin magunguna da kayan jinya.
Hukumar Lafiya ta Duniya (WHO) ma ta yi gargadi kan ƙarin tsanantar matsalar, yayin da hauhawar farashin sufuri da sauye-sauyen hanyoyin jigilar kaya ke ƙara tsananta lamarin. Masana sun ce wannan na iya zama mafi muni fiye da matsalolin da aka fuskanta a lokacin COVID-19 da yaƙin Ukraine.
Majiyar Labari: TRT AFRIKA
