Ripoti ya kijasusi iliyowasilishwa bungeni Kenya inaonyesha wengi walidanganywa kwa ahadi za ajira nzuri kisha kulazimishwa kupigana mstari wa mbele.
Zaidi ya raia 1,000 wa Kenya wameelezwa kujiunga na jeshi la Urusi kupigana katika vita vya Ukraine, huku wengi wao wakiripotiwa kurubuniwa kwa ahadi za kazi zenye malipo mazuri. Ripoti hiyo ya kijasusi iliwasilishwa katika bunge la Kenya, ikifichua ukubwa wa tatizo hilo.
Uchunguzi mbalimbali wa vyombo vya habari, ikiwemo ule uliochapishwa na AFP mapema mwezi huu, umeonyesha jinsi Urusi imekuwa ikiwavuta wanaume kutoka nchi za Afrika kwa ahadi za ajira nzuri, lakini hatimaye kulazimisha wengi wao kupigana mstari wa mbele nchini Ukraine.
