Shugaban Amurka, Donald Trump, ya bayyana cewa kasashen da rikicin rufe Mashigar Strait of Hormuz ya shafa za su tura jiragen ruwan yaki tare da Amurka domin tabbatar da cewa mashigar ta kasance a bude kuma cikin tsaro. A wata sanarwa da ya wallafa a dandalinsa na Truth Social, Trump ya yi kira ga kasashe kamar China, Faransa, Japan, Koriya ta Kudu da Birtaniya su taimaka wajen kare wannan muhimmin hanyar sufurin mai.
Trump ya kara da cewa Amurka za ta ci gaba da kai hare-hare a gabar tekun Iran tare da lalata jiragen ruwan Iran idan barazanar ta ci gaba. A cewarsa, duk da cewa karfin sojin Iran ya ragu sosai, har yanzu za su iya tura jiragen marasa matuki ko sanya bama-bamai a mashigar, abin da ke iya barazana ga zirga-zirgar jiragen ruwa.
Shugaban Amurkan ya kuma musanta rahotannin da ke cewa jiragen sama na Amurka guda biyar sun lalace bayan wani hari a wani filin jirgin sama a Saudiyya, yana mai kiran rahotannin “labaran karya”. Ya ce hudu daga cikin jiragen sun riga sun koma aiki domin ba su samu babbar illa ba.
Rikicin ya kara kamari tun bayan hare-haren hadin gwiwa da Isra’ila da Amurka suka kai wa Iran a ranar 28 ga Fabrairu, wanda ya yi sanadin mutuwar mutane sama da 1,200. Bayan haka Iran ta mayar da martani ta hanyar kai hare-haren jiragen marasa matuki da makamai masu linzami kan Isra’ila, Jordan, Iraki da wasu kasashen Tekun Fasha da ke daukar sansanonin sojin Amurka.
